தமிழ்ச்சோலைத் தலைமைப் பணியகம் ஆண்டு தோறும் அனைத்துப் பள்ளிகளையும் இணைத்து முத்தமிழ் விழா கொண்டாடி வருவது அனைவரும் அறிந்ததே. இவ்வாண்டு தமிழ்ச்சோலைத் தலைமைப் பணியகம் தன் பதினைந்தாவது ஆண்டு நிறைவு விழாவினை 29.12.2013 அன்று ஞாயிற்றுக்கிழமை LE GYMNASE PIERRE SCOHY, 1 ARISTIDE BRIAND, 93600 AULNAY S/B என்னும் இடத்தில் பெருமையுடன் கொண்டாடியது.

        குறித்த நேரமாகிய 11 மணிக்கு சிறப்பு விருந்தினர்களையும்,,உபஅமைப்புகளைச் சேர்ந்தவர்களையும் எமது பாரம்பரிய இசை வடிவமான இன்னியத்துடன் தமிழ்ச்சோலைத் தலைமைப் பணியகத்தினர் விழா மண்டபத்தினுள் அழைத்து வந்தனர்.

        சிறப்பு விருந்தினராக டென்மார்க்கிலிருந்து வருகை தந்திருந்த திரு, பொன்னம்பலம் மகேஸ்வரன் அவர்களும், பிரான்சு தமிழ்ச்சங்கங்களின் கூட்டமைப்பு பொறுப்பாளர் திரு ப, பாலசுந்தரம் அவர்களும் மங்கல விளக்கினை ஏற்றி வைத்தனர். அகவணக்கத்தினைத் தொடர்ந்து தமிழ்க்சோலைக்கீதம் வழங்கப்பட்டபின், தமிழ்ச்சோலைத் தலைமைப் பணியகச் செயற்பாட்டாளர் திரு.சிவஞானம் தனராஜா அவர்களால் வரவேற்புரை வழங்கப்பட்டது.

        இதனைத் தொடர்ந்து தமிழ்ச்சோலைப் பள்ளி மாணவர்களின் நிகழ்வுகள் ஆரம்பமாகின. மாணவர்கள் இயல், இசை, நாடகம் என்னும் முத்தமிழையும் ஒரே அரங்கில் தந்திருந்தனர் , பரதநாட்டியங்கள் , எழுச்சிநடனங்கள் , எமது மரபுவழி நடனங்களான கோலாட்டம் , கும்மி போன்ற நடனங்களும் , கவிதை , பேச்சு, நாடகம் , பட்டிமன்றம் , சங்கீதம் , வாத்திய இசை போன்ற நிகழ்வுகளும் எமது மரபுவழிக் கலையான வில்லிசையும் இடம் பெற்றன. சிலப்பதிகாரக் கதையை நாட்டிய நாடகம் மூலம் மிக அருமையாக வழங்கியிருந்தனர். அநேகமான நிகழ்வுகள் தாயக நினைவுகளையும் , தாய்மொழியின் பெருமைகளையும் சுமந்தே அமைந்திருந்தன.

        தமிழ்ச்சோலைத் தலைமைப் பணியகத்தின் பதினைந்து ஆண்டுகால சேவையில் அதன் வளர்ச்சி,, செயற்பாடுகள் பற்றிய விவரணப்படம் ஒன்றும் காண்பிக்கப்பட்டது . மேலும் தமிழ்ச்சோலைத் தலைமைப் பணியகத்தின் பதினைந்தாவது ஆண்டுவிழா மலரினை சிறப்பு விருந்தினராக வருகை தந்திருந்த திரு . பொன்னம்பலம் மகேஸ்வரன் அவர்கள் வெளியிட்டு வைக்க முதலாவது மலரினை பிரான்சு தமிழ்ச்சங்கங்களின் கூட்டமைப்பு பொறுப்பாளர் திரு ப .பாலசுந்தரம் அவர்கள் பெற்றுக்கொண்டபின் தொடர்ந்து அனைத்துப் பாடசாலை நிர்வாகிகளும் பெற்றுக் கொண்டனர். சிறப்பு விருந்தினராக வருகை தந்திருந்த திரு, பொன்னம்பலம் மகேஸ்வரன் அவர்கள் பத்து ஆண்டுகள் , இருபது ஆண்டுகள் ஆசிரியச்சேவையை நிறைவு செய்த ஆசிரியர்களைப் பாராட்டி மதிப்பளித்து, சிறப்புரை ஒன்றினையும் வழங்கியிருந்தார். இவர் தனது உரையில் தமிழ்ச்சோலை வளர்ச்சிக்காகப் பாடுபடும் அனைவரையும் வாழ்த்தியதுடன் இன்றைய சூழ்நிலையில் நாம் அனைவரும் ஒன்றுபட்டுச் செயற்பட வேண்டும் எனவும் கூறியிருந்தார்.

        இத்துடன் திருக்குறள் திறன் போட்டியில் வெற்றி பெற்ற மாணவர்களுக்கான வெற்றிக் கோப்பைகளையும், சான்றிதழ்களையும் தமிழர் கல்வி மேம்பாட்டுப் பேரவை இணைப்பாளர் திருமதி. அரியரட்ணம் நகுலேசுவரி அவர்களும் , திணைக்களமட்டத்தில் வெற்றி பெற்று இறுதிச் சுற்றுக்குத் தெரிவாகிய மாணவர்களுக்கான பதக்கங்களையும், சான்றிதழ்களையும் தமிழர் ஒருங்கமைப்புக் குழுவின் செயற்பாட்டாளர் திரு. சத்தியதாசன் அவர்களும் வழங்கி மதிப்பளித்தனர் . கல்வி மேம்பாட்டுப்பேரவை இணைப்பாளர் திருமதி. அரியறட்ணம் நகுலேசுவரி , தமிழர் ஒருங்கிணைப்புக் குழுவின்செயற்பாட்டாளர் திரு.சத்தியதாசன் ஆகியோரும் சுருக்கமாகத் தம் உரையினைத் தந்திருந்தனர்.

        ஆண்டு 12 சித்தியடைந்த மாணவர்களுக்கான சான்றிதழ்களைத் தமிழ்ச்சோலைத் தலைமைப் பணியகப் பொறுப்பாளர் திரு, ஜெயக்குமாரன் அவர்களும், இணையப் பல்கலைக் கழக நுழைவுத் தேர்வில் சித்தியடைந்த மாணவர்களுக்கான சான்றிதழ்களை தமிழர் ஒருங்கிணைப்புக் குழுவின் பரப்புரைப் பொறுப்பாளர் திரு.மேத்தா அவர்களும் வழங்கி மதிப்பளித்தனர்.

        இறுதியாக தமிழ்ச்சோலைத் தலைமைப் பணியகத்தினாரால் ஏற்பாடு செய்யப்பட்ட நல்வாய்ப்புச் சீட்டிழுப்பும் அதற்கான பரிசில்கள் வழங்கலும் இடம்பெற்ற பின், தமிழ்மொழி வாழ்த்துடன் நிகழ்வுகள் யாவும் இனிதே நிறைவு பெற்றன.